التسويق ، وكيف يصبح منهج حياه
التسويق هو علم رائع بنمارسه كل يوم فى حياتنا بدون مانحس بكده .ولما هتتعمق فيه شويه هتكتشف انك محتاج التسويق كل يوم فى حياتك .
انت لما بتتكلم كويس مع الناس ، أو بتلبس حلو ، أو بتطور نفسك فى مجال من مجالات الحياه فأنت بكده بتكسب ميزه تنافسيه بتنافس بيها ، ودى مهاره تسويقيه بتستخدمها عشان تسوق لنفسك .
لما بتتكلم أو بتتعامل مع الناس ، ياترى بتكلمهم كلهم بطريقه واحده او اسلوب واحد ؟
لا طبعا ..
انت بتعمل تقسيم للمجتمع بتاعك ، أهلك ، قرايبك ، اصحابك ، زمايلك فى الجامعه ، صحابك فى النادى ..
وبعد التقسيم اللى بتعمله ده بتستهدف كل شريحه حسب صفاتها وسلوكها ، وانت بتبقى عايز تظهر بصوره مختلفه لكل شريحه من دول .
فمثلا تظهر فى صورة المطيع فى البيت ،
والرياضى لاصحابك فى النادى ،
والاجتماعى مع زمايلك فى الكليه ،
والمجتهد فى دراسته لاستاذك فى الجامعه ..... وهكذا
وكلها مهارات بتتعلمها فى التسويق فى الاستراتيجيه التسويقية .
حتى لما بتيجى تدور على شغل بتدور الاول على احتياجات الشركات والسوق ، وبجانب ده بتعمل لنفسك تحليل داخلى وعلى أساس المعلومات اللى بتلاقيها عن السوق وعن نفسك بتطور نفسك وتحط سعر (مرتب متوقع)المفروض تاخده من الشركات دى ، وبتحاول تعمل لنفسك دعايه علشان الشركه تشوفك وتختارك عن غيرك .
وبالتالى التسويق هو العلم اللى ماينفعش تندم انك اتعلمته فى يوم من الايام .
لانك لما تتعلم التسويق بتتعلم معاه مهارات النجاح ،ومهارات التخطيط ، ومهارات التواصل ، ومهارات التفاوض ، ومهارات العرض والتقديم والاقناع ومهارات التفكير وحل المشاكل وكل المهارات اللى بتساعدك عشان تقدر تسوق لأى حاجه بتقدمها .
للاسف التسويق دخل بلادنا متأخر ، ولما دخل كنا بين طرفين متناقضين كرهونا فى التسويق .
طرف بيعلمك التسويق على أنه علم نظرى وشوية تعريفات ونظريات بتتحفظ .
وطرف تانى هو الشركات اللى مش فاهمه أو مستوعبه دور التسويق وبتشوفه يااما بيع او مجرد اعلان وبتطبقه بفهلوه بعيده كل البعد عن التسويق بمفهومه الواسع الشامل المبدع اللى مليان افكار ودراسه وتخطيط .
اتمنى اكون قدرت اوصل فكرتى لحضراتكم
دمتم فى أمان الله
احبكم فى الله
أزال أحد مشرفي المدونة هذا التعليق.
ردحذف