الدوره الدمويه فى جسم الانسان ، وعجائب خلق الله فى الدوره الدمويه

ايه هو التسويق ؟ تعرف على مفهوم التسويق وأهمية التسويق فى حياتنا 

السلام عليكم ورحمة الله وبركاته 

اهلا وسهلا بيكم فى حلقه جديده من مدونة يوميات رجل مبيعات ، حلقه جديده ومميزه بأمر الله تعالى عن مفهوم التسويق ، وأهمية التسويق فى حياتنا .

تعالوا نبدأ مع بعض بسرعه وندخل فى المفيد ..

التسويق

 هو علم رائع بنمارسه كل يوم فى حياتنا بدون مانحس بكده ، ولما هتتعمق فيه شويه هتكتشف إنك محتاج التسويق فى كل يوم فى حياتك .

انت لما بتتكلم كويس مع الناس ، أو بتلبس حلو ، أو بتطور نفسك فى اى مجال من مجالات الحياه ، فأنت بكده بتكتسب ميزه تنافسيه بتنافس بيها ، ودى مهاره تسويقيه ، بتستخدمها عشان تسوق لنفسك ..

لما بتتكلم أو بتتعامل مع الناس ، ياترى بتكلمهم كلهم بطريقه واحده او اسلوب واحد ؟ 

لا طبعا 

انت بتعمل تقسيم للمجتمع بتاعك ، اهلك - قرايبك - اصحابك - زمايلك فى الشغل - زمايلك فى الجامعه - صحابك فى النادى وهكذا ،.. وبعد التقسيم اللى بتعمله ده بتستهدف كل شريحه من دول .

فمثلا : تظهر فى صورة المطيع فى البيت ، والرياضى لاصحابك فى النادى ، والاجتماعى مع زمايلك فى الشغل أو الجامعه ، وهكذا ، وكلها مهارات بتتعلمها فى التسويق فى الاستراتيجيه التسويقية أو مايطلق عليه احيانا باسم ماركتينج .

حتى لما بتيجى تدور على شغل ، بتدور الاول على احتياجات الشركات والسوق ، بجانب ده بتعمل لنفسك تحليل داخلى ، وعلى أساس المعلومات اللى بتلاقيها عن السوق وعن نفسك بتطور نفسك ، وتحط سعر ( مرتب متوقع ) المفروض تاخده من الشركات دى ، وبتحاول تعمل لنفسك دعايه عشان الشركات تشوفك وتختارك عن غيرك ..

وبالتالى التسويق هو العلم اللى ماينفعش تندم انك اتعلمته فى يوم من الايام ، لانك لما بتتعلم التسويق بتتعلم معاه التالى : 

١- مهارات النجاح .

٢- مهارات التخطيط .

٣- ومهارات التواصل .

٤- مهارات التفاوض .

٥- مهارات العرض والتقديم والاقناع .

٦- مهارات التفكير وحل المشاكل .

٧- وكل المهارات اللى بتساعدك عشان تقدر تسوق لأى حاجه بتقدمها .

للاسف التسويق دخل بلادنا متأخر ، ولما دخل كنا مابين طرفين متناقضين كرهونا فى التسويق :

طرف بيعلمك التسويق على أنه علم نظرى وشويه تعريفات ونظريات بتتحفظ .

وطرف ثانى هو الشركات اللى مش فاهمه أو مستوعبه دور التسويق ، وبتشوفه يااما بيع او مجرد اعلان ، وبتطبقه بفهلوه بعيده كل البعد عن مفهوم التسويق الواسع الشامل المبدع اللى مليان افكار ودراسه وتخطيط .

التسويق ياجماعه مستحيل ببقى ولاعمره كان علم نظرى ، لان ببساطه علم التسويق اتحط فى الكتب لما خبراء التسويق واللى بيكتبوا فيه لقوا ان الشركات عملت حاجات ساعدتها عشان تكون ناجحه ويتحقق مبيعات وأرباح ونصيب سوقى وحب من الناس كبير ، فجمعوا الأفكار والاستراتيجيات اللى اتبعتها الشركات دى ، وعملوها فى علم سهل بسيط شيق وممتع جدا اسمه التسويق ، كله حالات وافكار ، يعنى باختصار اللى حصل أن التسويق حاجه عملى ناجحه جدا خبراء التسويق حطوهالنا فى الكتب والمحاضرات عشان نستفيد منها وتختصر علينا الوقت والمجهود اللى كنا هنعمله عشان نجيب الأفكار والاستراتيجيات الناجحه دى ، مش العكس زى ما كتير متخيل أن فى ناس قعدوا يألفوا فى كتب ويخترعوا نظريات ومصطلحات ممله .

الحاجه التانيه أن التسويق مش هو البيع ، ولا الاعلان ، ولا هو مكالمه بيع لعميل ، أو انك تعمل صفحه على الفيس بوك عليها صور منتجك ، .. كل دى اشكال تسويقيه ، لكن التسويق مش هو الاشكال دى بس ..

التسويق عمليه اكبر بكتير جدا ، التسويق هو عمليه النجاح الشامله اللى بتبدأ من اول وجود الشركه وهى بتدرس السوق وبتعرف احتياجات العميل ، وبيشمل بعد كده وضع استراتيجيه تسويقيه عبقريه تضمن لك تحقيق كل الاهداف التسويقية اللى بتحلم بيها ، وبعد كده برامج تسويقيه مبدعه جدا بتشمل تطوير المنتجات والخدمات وتسعيرها وتوزيعها والدعايه والترويج ليها ، وبتنتهى بأن الشركه تحافظ على العلاقات المربحه القويه مع العميل مدى الحياه.

دمتم فى امان الله 

اتمنى اكون قدرت أفيدكم فى حلقة النهارده ، والى لقاء اخر ، والسلام عليكم ورحمة الله وبركاته .